أنا عايز أخس: ثلاث كلمات لازم تمسحها من قاموسك

كلمتين نفسي يتمحوا من عقليتنا: “عايزة أخس” و”بأعمل ريجيم”. 

شوف. لو المفهومين دول جايبين معاك نتيجة بجد..ما تكملش قراءة. وقف لحد هنا. التدوينة دي مش عشانك.

لكن لو انت بقالك سنوات لاقي نفسك بتقول الجملتين دول…خليك معاي شوية.

واسأل نفسك…هل محاولات الخسسان المستمرة والريجيم اللي شوية تعمله وشوية تكسل عنه…هل حاجة فيهم جابت معاك نتيجة استمر مفعولها؟ ولو ما جابتش نتيجة…مش يمكن الغلط الحقيقي في المفهومين مش فيك أنت؟

أنا بأتكلم جد على فكرة.

مبدأ الخسسان عند الأغلبية الغالبة مرتبط بالشكل الخارجي. لأسباب واضحة لنا كلنا أصبحنا مهووسين بمنظرنا قدام الناس. مش بس مهووسين بمنظرنا…كمان مهووسين أن منظرنا يكون متطابق لمنظر ما يسوّق لنا على أنه المثالي…في حين أنه منظرنا مش شيء المفروض هو اللي نخاف منه أو نخاف عليه. اللي المفروض نخاف عليه هو صحتنا. وقد يكون الوزن الزائد هو أحد أعراض حالة صحية غير متزنة. لكن في النهاية الوزن الزائد في الحالة دي هو عرض لشيء ثاني والأصل في حل الأشياء أنك تركز على المرض أو على المشكلة الأصلية وليس على العرض. فالتركيز على العرض لن يحل شيئا.

نفسي الناس تبطل تفكر في الأمر على أني لازم أنقص وزني عشان شكلي يكون كويس. نفسي الناس بدل كده تقول: أنا محتاجة أهتم بصحتي. محتاجة أني أقدر أطلع سلم من غير ما أنهك تماماً. محتاج أني يبقى فيّ حيل عشان آخذ بالي من ولادي وألعب معاهم.

ولما تحصل النقلة دي في التفكير من الاهتمام بالشكل والمظهر للإهتمام العام بالصحة حتلاقي حاجات كثيرة أوي اتغيرت.

حتلاقيك بتفكر في صحتك على المدى البعيد مش في ريجيم طوله شهرين.

حتلاقيك بتركز على الجوهر بدل ما كنت بتركز على المظهر.

حتلاقيك بدأت مشوار حيغير حياتك كلها للأفضل مش تعذيب نفسي وجسدي مدته شهرين وبعدين ترجع لعاداتك القديمة بل ولصحتك غير المتزنة هي كمان.

بدل ما تقول: أنا حأعمل ريجيم مدته شهرين عشان أخس…عايزاك تقول: أنا حأعمل تغيير جذري ودائم في نمط حياتي عشان صحتي تبقى كويسة على طول.

يعني أيه تغيير نمط حياتي؟

معناه أولا أنك مش بتعمل بعض التغيرات الغذائية (ريجيم) لمدة محدودة من الزمن. معناه أنك بتتعلم ازاي تاكل أكل صحي وترفض الأكل غير الصحي لباقي عمرك.

معناه أنك حتبدأ تتحرك وتعمل رياضة بشكل منتظم.

معناه أنك حتبطل واحدة واحدة تصرفاتك غير الصحية  وتبدلها بتصرفات صحية.

ما تغيرش كل حاجة مرة واحدة لأن ده صعب أنك تستمر عليه. والفكرة كلها أنك تعمل حاجات تقدر تستمر في عملها لباقي حياتك.

ابدأ بأنك تقلل السكر اللي بتحطه في الشاي. لو بتحط ٣ ملاعق قللهم خليهم ٢. ولما تتعود على ٢ قللهم خليهم ملعقة واحدة. ولما تتعود على ده استجدع وبطل تحط سكر في الشاي خالص. المبدأ ده يمكن تحس أنه غريب في الأول. لكن الواقع هو أنك بتتعود على طعم الشيء من غير السكر بعد فترة من الزمن بل وبتلاقي نفسك مستمتع بالطعم الحقيقي للأشياء. قلل السكر اللي بتحطه على الكورنفليكس الصبح لحد ما تبطل تحط سكر خالص. عارف حتكتشف أيه؟ حتكتشف لما لسانك ياخد على عدم وجود سكر في الأكل أن الشركات بتضيف كميات غير منطقية من السكر في منتجاتهم. حتكتشف أن بعض أنواع الأكلات مانتش قادر تاكلها أساسا لأنها مسكرة زيادة عن اللزوم.

بطل تشرب مشروبات غازية. تماماً. حتلاقيك متعود عليها في الأول وتوقيفها صعب. لكن جاهد نفسك. لو ما عملتش أي تغيير نمطي في حياتك غير دي حتلاقي قد ايه هذا التغيير البسيط ممكن يغير حاجات كثير أوي فيك.

قلل الملح اللي بتحطه في الأكل. زي السكر حتلاقي ان الشركات بتحط كميات كبيرة من الملح في أكلها. كمان حتكتشف أن أكلات كثير بيبقى طعمها أحلى لما بتقدر تذوق طعمها الطبيعي أساسا.

احرص أنك تاكل ٣ وجبات في اليوم. أنك تحرم نفسك من وجبة أو اثنين عشان تخس ده مش صحي. أنك تاكل ٣ وجبات بها كميات معقولة وتنوع كويس وصحي حيعمل معاك فرق كبير جدا. اوعى اوعى اوعى تنزل من البيت من غير ما تفطر. كل شوية فول بنصف رغيب عيش. أو كل طبق مشكل من الفاكهة. أو كل نوع من أنواع الcereals بس تكون متأكد أنه مش متضاف لها سكر كثير. أكل الoatmeal أو الشوفان في الصباح مع شوية فاكهة في نفس الطبق أو حبة عسل صغيرين خيار ممتاز.

بدّل الأبيض بالبني. كل العيش البني واستخدم العسل بدل السكر والمكرونة البنية بدل البيضاء والرز البرياني البني بدل الرز المصري الأبيض واستخدم الدقيق البني كل ما تقدر في طبيخك بدل الدقيق الأبيض. أهم فرق هو أن الرز البني والدقيق البني بيكونوا لسه محافظين على مغذيات هامة ليك.

خلي الوجبة الثالثة بتاعتك قبل نومك بساعتين ثلاثة. ده حيدي فرصة لمعدتك تهضم أكلك بشكل صحي وكمان حيساعد أن نومك يكون مرتاح. لو حسيت بجوع اشرب مايه. أو استحمل شوية. ما انت واكل ٣ وجبات كويسين انهارده. ما اتحرمتش من حاجة. انت حتكتشف ان الاحساس بالجوع ده شيء بييجي ويروح مش بيفضل قاعد كابس على نفسك. لو جعان اوي اوي كل خيار أو جزر أو شوية فاكهة.

اطبخ بزيت الزيتون بدل السمنة. بطل قلي واطبخ الحاجة في الفرن أو بالبخار.

مش حأقولك بطل حلويات. انا مقتنعة تماماً أن الحرمان من الشيء بيجيب مفعول عكسي تماما وحتلاقيك بعد ما حرمت نفسك أسبوع ولا اثنين رجعت تاكل من اللي حرمت نفسك منه بشراهة بعدين. كل يا سيدي حلويات. لكن قلل عدد المرات اللي بتاكل فيها حلويات في الاسبوع. لو متعود تاكل كل يوم حاجة حلوة…خليها ٣ مرات في الأسبوع بس. وما تاكلش طبق كبير أو حتة كبيرة. كل نصف حتة. أو ملعقة واحدة بس. ذوق واستمتع مش تموت نفسك من الشبع.

لما تاكل وجبة من الوجبات الرئيسية كل بالراحة. حاول تخلي الوجبة تقعد معاك لمدة ثلث ساعة. أصل مخك بيبدأ يرسل إشارات بالإحساس بالشبع بعد ما بتبدأ تاكل بثلث ساعة. امسك ساعتك وجرب تحسبها كده؟ حتلاقيك بعد ثلث ساعة بدأت تحس بالشبع مع كمية أقل من الأكل. وطبعا راعي الكميات اللي بتحطها على طبقك. أنت مش محتاج حد يقولك الكمية الصحية أيه والكمية غير الصحية أيه. شوية زر برياني بني على حتة لحمة على شوية خضار وجنبهم شوية سلاطة…حلوين أوي أوي أوي. كلهم بالراحة وبالوقت حتلاقي ان الكمية دي مناسبة وكل حاجة. مش لازم تقوم من الأكل حاسس وكأنك مش قادر تتحرك من الشبع. قوم من الأكل خفيف. رسولنا الكريم قال أيه؟ ثلث لطعامك وثلث لشرابك وثلث لنفسك.

عايز تهضم بعد الأكل؟ بدل ما تشرب بيبسي جرب كده تشرب نعناع.

نام كويس. بطل تسهر طول الليل تتفرج على التليفزيون. اعرف عدد ساعات النوم اللي جسمك بيحتاجهم عشان تبقى صاحي ومفرفش. بعضنا بيحتاج ٨ ساعات نوم…وبعضنا بيحتاج ل٦ بس. اعرف احتياجاتك وما تقصرش في حق جسمك في النوم الصحي. لو أنت بتنزل الشغل الساعة ٧ كل يوم الصبح…نام الساعة ٩ ونص أو ١٠ بالليل عشان تصحى الصبح الساعة ٥ ونص أو ٦. الوقت ده يكفي انك تعمل فيهم نصف ساعة رياضة صباحية وتاخد دش وتفطر فطار كويس قبل ما تنزل. حتلاقيك مليء بالنشاط والحيوية طول اليوم.

اعمل رياضة…الرياضة قرار…قرار حيغير حياتك.

خلي الرياضة جزء لا يتجزأ من حياتك زي أكلك وشربك ونومك. لو كان ده المبدأ عندك حتلاقيك بتعملها مهما كانت وراك من مشاغل ومهما كنت تعبان. أنا بألاقي أن رياضة الصبح هي أحسن حاجة بالنسبة لي. نقي وقت معين اثناء النهار وفي أيام معينة هو الوقت بتاع الرياضة بتاعتك. لما تثبت ميعاد حتلاقي جسمك بيقولك يلى. لما بتسيبها للظروف حتلاقي عقلك بيقولك خليها بكره.

شيل الميزان من البيت. تماماً. إلغيه من حياتك لمدة سنة على الأقل. ما احن قلنا أن هدفك مش أنك تخس. هدفك أنك تهتم بصحتك. تعالى بعد سنة من تغيير نمط حياتك وقارن بين إحساسك بنفسك السنة اللي فاتت وإحساسك بنفسك دلوقت وبعدين افتكرني بدعوة حلوة.

محاولة الحصول على صحة نفسية في قمة الأهمية عشان كل ده ينجح. لو حياتك مليئة بالمشاكل والهموم والقلق حتلاقي أنه صعب تركز على الحاجات الثانية. ساعات كثير المرض الأصلي ممكن ترجعه لعدم اتزان نفسي..يعني مشكلتك الأساسية مش أن وزنك زائد حبة…مشكلتك الأساسية عدم اتزان نفسي…ولما تحل المشكلة الأساسية حتلاقي أنه أسهل تتعامل مع أعراض المشكلة.

كلنا عندنا هموم في حياتنا. ربنا سبحانه قال في كتابه الكريم: “لقد خلقنا الإنسان في كبد”. الله تعالى كمان قال: “إنك كادح إلى ربك كدحاً فملاقيه”.

يعني ما تتوقعش أن الطبيعي أن الحياة تكون سهلة ويسيرة. لكن بعض مشاكل حياتنا قابلة للحل. وبعض الحاجات اللي مضايقانا ممكن نواجهها ونتعامل معاها. بل ومن الممكن أننا نتعلم ازاي يكون عندنا تقبل ورضا أكثر وهدوء نفسي أكبر في التفاعل مع المشاكل اللي بتقابلنا كلنا كل يوم. من المؤكد أنك لو نايم كويس ولو واكل أكل صحي بكميات معقولة ولو عامل رياضة حتلاقي نفسيتك أفضل وبالتالي عندك طاقة نفسية عشان تتعامل مع مشاكل الحياة. وكمان من المؤكد أنك لما تبقى نفسيتك كويسة حتقدر تهتم بصحتك أحسن. يعني كله لازم يمشي مع بعضه.

ما احن قلنا: أنت ما عادش هدفك تخس. هدفك أنك تغير نمط حياتك كله.

جربها كده ومستنياك تحكي لي حصل أيه بعد سنة من دلوقت.