أنا عايز أخس: ثلاث كلمات لازم تمسحها من قاموسك

كلمتين نفسي يتمحوا من عقليتنا: “عايزة أخس” و”بأعمل ريجيم”. 

شوف. لو المفهومين دول جايبين معاك نتيجة بجد..ما تكملش قراءة. وقف لحد هنا. التدوينة دي مش عشانك.

لكن لو انت بقالك سنوات لاقي نفسك بتقول الجملتين دول…خليك معاي شوية.

واسأل نفسك…هل محاولات الخسسان المستمرة والريجيم اللي شوية تعمله وشوية تكسل عنه…هل حاجة فيهم جابت معاك نتيجة استمر مفعولها؟ ولو ما جابتش نتيجة…مش يمكن الغلط الحقيقي في المفهومين مش فيك أنت؟

أنا بأتكلم جد على فكرة.

مبدأ الخسسان عند الأغلبية الغالبة مرتبط بالشكل الخارجي. لأسباب واضحة لنا كلنا أصبحنا مهووسين بمنظرنا قدام الناس. مش بس مهووسين بمنظرنا…كمان مهووسين أن منظرنا يكون متطابق لمنظر ما يسوّق لنا على أنه المثالي…في حين أنه منظرنا مش شيء المفروض هو اللي نخاف منه أو نخاف عليه. اللي المفروض نخاف عليه هو صحتنا. وقد يكون الوزن الزائد هو أحد أعراض حالة صحية غير متزنة. لكن في النهاية الوزن الزائد في الحالة دي هو عرض لشيء ثاني والأصل في حل الأشياء أنك تركز على المرض أو على المشكلة الأصلية وليس على العرض. فالتركيز على العرض لن يحل شيئا.

نفسي الناس تبطل تفكر في الأمر على أني لازم أنقص وزني عشان شكلي يكون كويس. نفسي الناس بدل كده تقول: أنا محتاجة أهتم بصحتي. محتاجة أني أقدر أطلع سلم من غير ما أنهك تماماً. محتاج أني يبقى فيّ حيل عشان آخذ بالي من ولادي وألعب معاهم.

ولما تحصل النقلة دي في التفكير من الاهتمام بالشكل والمظهر للإهتمام العام بالصحة حتلاقي حاجات كثيرة أوي اتغيرت.

حتلاقيك بتفكر في صحتك على المدى البعيد مش في ريجيم طوله شهرين.

حتلاقيك بتركز على الجوهر بدل ما كنت بتركز على المظهر.

حتلاقيك بدأت مشوار حيغير حياتك كلها للأفضل مش تعذيب نفسي وجسدي مدته شهرين وبعدين ترجع لعاداتك القديمة بل ولصحتك غير المتزنة هي كمان.

بدل ما تقول: أنا حأعمل ريجيم مدته شهرين عشان أخس…عايزاك تقول: أنا حأعمل تغيير جذري ودائم في نمط حياتي عشان صحتي تبقى كويسة على طول.

يعني أيه تغيير نمط حياتي؟

معناه أولا أنك مش بتعمل بعض التغيرات الغذائية (ريجيم) لمدة محدودة من الزمن. معناه أنك بتتعلم ازاي تاكل أكل صحي وترفض الأكل غير الصحي لباقي عمرك.

معناه أنك حتبدأ تتحرك وتعمل رياضة بشكل منتظم.

معناه أنك حتبطل واحدة واحدة تصرفاتك غير الصحية  وتبدلها بتصرفات صحية.

ما تغيرش كل حاجة مرة واحدة لأن ده صعب أنك تستمر عليه. والفكرة كلها أنك تعمل حاجات تقدر تستمر في عملها لباقي حياتك.

ابدأ بأنك تقلل السكر اللي بتحطه في الشاي. لو بتحط ٣ ملاعق قللهم خليهم ٢. ولما تتعود على ٢ قللهم خليهم ملعقة واحدة. ولما تتعود على ده استجدع وبطل تحط سكر في الشاي خالص. المبدأ ده يمكن تحس أنه غريب في الأول. لكن الواقع هو أنك بتتعود على طعم الشيء من غير السكر بعد فترة من الزمن بل وبتلاقي نفسك مستمتع بالطعم الحقيقي للأشياء. قلل السكر اللي بتحطه على الكورنفليكس الصبح لحد ما تبطل تحط سكر خالص. عارف حتكتشف أيه؟ حتكتشف لما لسانك ياخد على عدم وجود سكر في الأكل أن الشركات بتضيف كميات غير منطقية من السكر في منتجاتهم. حتكتشف أن بعض أنواع الأكلات مانتش قادر تاكلها أساسا لأنها مسكرة زيادة عن اللزوم.

بطل تشرب مشروبات غازية. تماماً. حتلاقيك متعود عليها في الأول وتوقيفها صعب. لكن جاهد نفسك. لو ما عملتش أي تغيير نمطي في حياتك غير دي حتلاقي قد ايه هذا التغيير البسيط ممكن يغير حاجات كثير أوي فيك.

قلل الملح اللي بتحطه في الأكل. زي السكر حتلاقي ان الشركات بتحط كميات كبيرة من الملح في أكلها. كمان حتكتشف أن أكلات كثير بيبقى طعمها أحلى لما بتقدر تذوق طعمها الطبيعي أساسا.

احرص أنك تاكل ٣ وجبات في اليوم. أنك تحرم نفسك من وجبة أو اثنين عشان تخس ده مش صحي. أنك تاكل ٣ وجبات بها كميات معقولة وتنوع كويس وصحي حيعمل معاك فرق كبير جدا. اوعى اوعى اوعى تنزل من البيت من غير ما تفطر. كل شوية فول بنصف رغيب عيش. أو كل طبق مشكل من الفاكهة. أو كل نوع من أنواع الcereals بس تكون متأكد أنه مش متضاف لها سكر كثير. أكل الoatmeal أو الشوفان في الصباح مع شوية فاكهة في نفس الطبق أو حبة عسل صغيرين خيار ممتاز.

بدّل الأبيض بالبني. كل العيش البني واستخدم العسل بدل السكر والمكرونة البنية بدل البيضاء والرز البرياني البني بدل الرز المصري الأبيض واستخدم الدقيق البني كل ما تقدر في طبيخك بدل الدقيق الأبيض. أهم فرق هو أن الرز البني والدقيق البني بيكونوا لسه محافظين على مغذيات هامة ليك.

خلي الوجبة الثالثة بتاعتك قبل نومك بساعتين ثلاثة. ده حيدي فرصة لمعدتك تهضم أكلك بشكل صحي وكمان حيساعد أن نومك يكون مرتاح. لو حسيت بجوع اشرب مايه. أو استحمل شوية. ما انت واكل ٣ وجبات كويسين انهارده. ما اتحرمتش من حاجة. انت حتكتشف ان الاحساس بالجوع ده شيء بييجي ويروح مش بيفضل قاعد كابس على نفسك. لو جعان اوي اوي كل خيار أو جزر أو شوية فاكهة.

اطبخ بزيت الزيتون بدل السمنة. بطل قلي واطبخ الحاجة في الفرن أو بالبخار.

مش حأقولك بطل حلويات. انا مقتنعة تماماً أن الحرمان من الشيء بيجيب مفعول عكسي تماما وحتلاقيك بعد ما حرمت نفسك أسبوع ولا اثنين رجعت تاكل من اللي حرمت نفسك منه بشراهة بعدين. كل يا سيدي حلويات. لكن قلل عدد المرات اللي بتاكل فيها حلويات في الاسبوع. لو متعود تاكل كل يوم حاجة حلوة…خليها ٣ مرات في الأسبوع بس. وما تاكلش طبق كبير أو حتة كبيرة. كل نصف حتة. أو ملعقة واحدة بس. ذوق واستمتع مش تموت نفسك من الشبع.

لما تاكل وجبة من الوجبات الرئيسية كل بالراحة. حاول تخلي الوجبة تقعد معاك لمدة ثلث ساعة. أصل مخك بيبدأ يرسل إشارات بالإحساس بالشبع بعد ما بتبدأ تاكل بثلث ساعة. امسك ساعتك وجرب تحسبها كده؟ حتلاقيك بعد ثلث ساعة بدأت تحس بالشبع مع كمية أقل من الأكل. وطبعا راعي الكميات اللي بتحطها على طبقك. أنت مش محتاج حد يقولك الكمية الصحية أيه والكمية غير الصحية أيه. شوية زر برياني بني على حتة لحمة على شوية خضار وجنبهم شوية سلاطة…حلوين أوي أوي أوي. كلهم بالراحة وبالوقت حتلاقي ان الكمية دي مناسبة وكل حاجة. مش لازم تقوم من الأكل حاسس وكأنك مش قادر تتحرك من الشبع. قوم من الأكل خفيف. رسولنا الكريم قال أيه؟ ثلث لطعامك وثلث لشرابك وثلث لنفسك.

عايز تهضم بعد الأكل؟ بدل ما تشرب بيبسي جرب كده تشرب نعناع.

نام كويس. بطل تسهر طول الليل تتفرج على التليفزيون. اعرف عدد ساعات النوم اللي جسمك بيحتاجهم عشان تبقى صاحي ومفرفش. بعضنا بيحتاج ٨ ساعات نوم…وبعضنا بيحتاج ل٦ بس. اعرف احتياجاتك وما تقصرش في حق جسمك في النوم الصحي. لو أنت بتنزل الشغل الساعة ٧ كل يوم الصبح…نام الساعة ٩ ونص أو ١٠ بالليل عشان تصحى الصبح الساعة ٥ ونص أو ٦. الوقت ده يكفي انك تعمل فيهم نصف ساعة رياضة صباحية وتاخد دش وتفطر فطار كويس قبل ما تنزل. حتلاقيك مليء بالنشاط والحيوية طول اليوم.

اعمل رياضة…الرياضة قرار…قرار حيغير حياتك.

خلي الرياضة جزء لا يتجزأ من حياتك زي أكلك وشربك ونومك. لو كان ده المبدأ عندك حتلاقيك بتعملها مهما كانت وراك من مشاغل ومهما كنت تعبان. أنا بألاقي أن رياضة الصبح هي أحسن حاجة بالنسبة لي. نقي وقت معين اثناء النهار وفي أيام معينة هو الوقت بتاع الرياضة بتاعتك. لما تثبت ميعاد حتلاقي جسمك بيقولك يلى. لما بتسيبها للظروف حتلاقي عقلك بيقولك خليها بكره.

شيل الميزان من البيت. تماماً. إلغيه من حياتك لمدة سنة على الأقل. ما احن قلنا أن هدفك مش أنك تخس. هدفك أنك تهتم بصحتك. تعالى بعد سنة من تغيير نمط حياتك وقارن بين إحساسك بنفسك السنة اللي فاتت وإحساسك بنفسك دلوقت وبعدين افتكرني بدعوة حلوة.

محاولة الحصول على صحة نفسية في قمة الأهمية عشان كل ده ينجح. لو حياتك مليئة بالمشاكل والهموم والقلق حتلاقي أنه صعب تركز على الحاجات الثانية. ساعات كثير المرض الأصلي ممكن ترجعه لعدم اتزان نفسي..يعني مشكلتك الأساسية مش أن وزنك زائد حبة…مشكلتك الأساسية عدم اتزان نفسي…ولما تحل المشكلة الأساسية حتلاقي أنه أسهل تتعامل مع أعراض المشكلة.

كلنا عندنا هموم في حياتنا. ربنا سبحانه قال في كتابه الكريم: “لقد خلقنا الإنسان في كبد”. الله تعالى كمان قال: “إنك كادح إلى ربك كدحاً فملاقيه”.

يعني ما تتوقعش أن الطبيعي أن الحياة تكون سهلة ويسيرة. لكن بعض مشاكل حياتنا قابلة للحل. وبعض الحاجات اللي مضايقانا ممكن نواجهها ونتعامل معاها. بل ومن الممكن أننا نتعلم ازاي يكون عندنا تقبل ورضا أكثر وهدوء نفسي أكبر في التفاعل مع المشاكل اللي بتقابلنا كلنا كل يوم. من المؤكد أنك لو نايم كويس ولو واكل أكل صحي بكميات معقولة ولو عامل رياضة حتلاقي نفسيتك أفضل وبالتالي عندك طاقة نفسية عشان تتعامل مع مشاكل الحياة. وكمان من المؤكد أنك لما تبقى نفسيتك كويسة حتقدر تهتم بصحتك أحسن. يعني كله لازم يمشي مع بعضه.

ما احن قلنا: أنت ما عادش هدفك تخس. هدفك أنك تغير نمط حياتك كله.

جربها كده ومستنياك تحكي لي حصل أيه بعد سنة من دلوقت.

Advertisements

14 thoughts on “أنا عايز أخس: ثلاث كلمات لازم تمسحها من قاموسك

  1. وربنا انت استاذ 🙂 ع فكره انا لسه شايف الكلام دلوقتى بس معظم الافكار دى انا عملتها وفعلا حاسس ان نفسيتى ارتاحت عن الاول لما بقيت بروح جيم وبعمل رياضه وشيلت دماغى من الميزان خالص وبالنسبه للاكل معملتش رجيم زى الاول كان وزنى بيزيد لما بعمل رجيم كان وزنى 89 وطولى 182 بس جيت بالصدفه بوزن نفسى قريب حوالى 83 بس ع فكره يعنى الموضوع خد معايا فتره مثلا متقلش عن 6 اشهر بس اهم حاجه حاسس براحه وحاسس انى عندى هدف بس بجد كلام كتير من الى انت قولته مظبوط جدا ودا الى الناس مفروض تفهمه وتعمله ….. احييك ع مقالك (Y)

    Like

  2. بجد ربنا يبارك فيك انت رائع الكلام ده خطير جدا وفعلا عندك حق فيه هو نمط حياة والشعب المصري مشكلته في انماطه اللي تعود عليهاغلط منذ الصغر انا حطبع كلامك وحنفذه ان شاء الله وحنشرة كمان وياريت اتواصل مع سيادتك جزاك الله خيرا

    Like

  3. عندك حق انا من ساعة اما وزنى ازداد وانا كل تفكيرى ان انا ازاى اخس فى اسرع وقت عشان مظهرى ولازم اكون زى فلانة بس عملته لمدة اسبوع وبالفعل رجعت عوضت كله تانى ودلوقتى برضك عاد ليا نفس تفكيرى ان انا ازاى اخس باسرع وقت لكن وانا ببحث دخلت ع الموقع وبجد انت عندك حق فى كل كلمة وانا ان شاء الله هعمل ع اللى انت قلت عليه وجزاك الله كل خيييير

    Like

  4. بجد مقال جميل انا كنت بقالي 4سنين من ساعه ما اتجوزت بقول عايزه اخس وافشل الكلم اللي قولتيه ده توصلتله من 6شهور بعد محاولات يائسه قعدت مع نفسي وقولت انا عايزه ايه فحددت اهدافي اولا رجلي بتوجعني لانها شايله كتير 100 كيلو بس طولي 171 يعني عايزه انزل حوالي 25 كيلو ثانيا سني 25 سنه وبسبب السمنه بلبس لبس تلاتيناتي اربيعيناتي هدفي اني ارجع البس لبس انا اللي اختاره مش اي شوال يجي علي مقاسي نفسي البس جيبه زي زمان كرهت البنطلون ثالثا عايزه البس لبس بيتي علي الموضه لاقتناعي ان عمر التخينه ما هايكون عدها ثقه في نفسها في لبس البيت علشان كده هاتلجا للعبايه والبيجامات اللي شبه الشوال رابعانفسي في المصيف اكل زي مانا عايزه وبعد كده انزل الخمسه كيلو دول بعا في اهداف تانيه كتير اهمها اني عايزه ارجع جميله زي زمان قبل الجواز الحمد لله وصلت للوزن اللي انا عايزه بالاراده والبعد عن الطرق بتاعت اشربي شاي او خدي كبسوله وكلي زي ماانتي عايزه اعملو لنفسكم نظام حياه رياضه واكل به سعرات حراريه اقل انا فرحانه بنفسي قوي واستفدت جدا من سماعي برنامج ذا لوست لوزرز الخاسر الكبيراللي كان بييجي علي ام بي سي اسفه علي الاطاله بس كنت عايزه احكي عن تجربتي الناجحه

    Like

  5. انا من سنين بحاول اخس وكل ما انجح في فقد عشره كيلو ارجع تاني بس كل مره زياده اتنين كيلو لحد ما اصبح وازني بيزيد عن الوزن المثالي حوالي خمسه وعشرين كيلو واصبح موضوع التخسيس هو الموضوع الوحيد لمسيطر علي تفكيري بدون محاوله حقيقيه وجاده مني لفقدان الوزن الزاءد النهارده انا قررت اغير حياتي وهشيل الميزان من البيت وهعمل الحضرتك قلت عليه وعندي امل المرادي اني احسن صحتي ادعولي

    Like

  6. شكرا على كلامك الجميل والمفيد فعلا والمقنع .. وانا مش تخينة لكن لكن لما بذيد شوية بضايق لنفس السبب اللى انت ذكرتة وهو اننا بنلاقى اللبس بقى ضيق علينا وحركتنا بقت بطيئة وبنحس ان اسلوبنا فى الاكل ده اكبر غلط .. ومافيهاش حاجة لما تبقى مليان شوية وصحتك حلوة لكن تبقى مصيبة لو كنت نحيف وهزيل ومش قادر تبذل اى مجهود

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s