بعبع الحيض ونهار رمضان

صور رمضان كريم من يوم ما وعيت على الدنيا واللي فاطر في أسرتنا في رمضان …سواء لأنه طفل أو لأنها انثى حائض … بياكلوا في البيت في نهار رمضان بشكل عادي جدا جدا من غير ده ما يلفت انتباه حد أساسا.أنا انهارده فاطرة (بعذر) وقمت من شوية جبت لنفسي حتة فطيرة وجنبها حتة آيس كريم ولما ابني المراهق اللي عنده ١٧ سنة شافني قالي وهو بيضحك: ما تجيبي حتة يا ماما؟ قلت له اتفضل يا حبيبي وأنا برده بأضحك

ولادي من يوم ما أصبح عندهم وعي وهم فاهمين أن المرأة بتيجي عليها أوقات ما بتصليش وما بتصومش. لما كانوا صغيرين شرحت لهم ببساطة أن الست بيبقى عندها عذر. لما كبروا وحبوا يفهموا العذر ده يبقى أيه شرحت لهم أن ربنا خلق رحم المرأة عشان يستقبل البيبي…ولما ما بيبقاش فيه بيبي فيه شوية دم بينزلوا. وانتهى الموضوع. لا حد فيهم كان قرفان من المبدأ ولا مستغرب وده لأني ما شرحتهوش بقرف ولا على أنه شيء غريب. هو ربنا خلقنا كده. عادي جدا

لما كنت بنت في بيت أبوي وكنا احن البنات بنحتاج أولويز كنا نستسهل نقول لأخوي الصغير (فرق السن بيني وبينه ١١ سنة) أنه يضرب مشوار سريع للصيدلية أو للبقال عشان يجيب لنا شوية. ولا الموضوع كان بالنسبة له غريب بالمرة. كان يقوم ويجيب لنا واحن نقوله شكرا. لما كبرت وبقيت أم برده لما أتزنق بأبعث حد من الولاد يجيب لي أولويز. برده عادي جدا ما حدش فيهم بيتضايق (غير من مبدأ ضرب المشوار من أساسه لأنهم كسلانين حبتين وكل اللي عايزينه في حياتهم انهم يقعدوا قدام الآيباد بتاعهم ويلعبوا جيمز)

امبارح قرأت مقالة لمروة مأمون على موقع هنا صوتك بتتساءل فيه هو احن ليه كنساء مطلوب مننا ما نجهرش بالإفطار لما بيكون علينا عذر أساسا. المقال عجبني لأنها بتتناول حاجة
نادر ما بألاقي الناس تتكلم فيه علناً. فشيرت المقالة عندي على الفيسبوك

قمت لقيت أحد الشباب بيشرح ليه هو شايف ان المرأة مش المفروض تجهر بالصوم. وأرجو أن الشاب يسامحني أني بأستخدم المفهوم العام لرده  لأن رده ده بيمثل مش رد شاب بعينه لكن منطق عام بألاقيه بيستخدم من أجل تبرير بعض الأفعال. الشاب شرح لي أنه لما حد بيخرج سندويتش ريحته حلوة قدام صائم ممكن يكون تعبان في الشغل مثلا فده فيه إيذاء له

المنطق ده هو نفس المنطق اللي بيستخدم لما ييجي راجل يقول أنه مش عايز يشوف امرأة قدامه من غير حجاب لأنه بيفتن في دينه. هو نفس المنطق اللي بيستخدمه المتحرش: أصلها مش لابسة كويس فما قدرتش أمنع نفسي. المنطق بتاع: ما حدش ياكل قدامي لاحسن بأتأذي ده منطق عجيب يدل على ضعف في النفوس لا أول له ولا آخر

انا لما علموني معنى الصيام علموني ان الصيام ده جهاد للنفس. كمان علموني الحديث القدسي ده: عن أبي هريرة رضي الله عنه أن رسول الله صلى الله عليه وسلم قال: (قال الله عز وجل: كل عمل ابن آدم له إلا الصيام؛ فإنه لي وأنا أجزي به

يعني لما بأكون صايمة مثلا في انجلترا (وهو واقعي الحالي) وبأنزل أعمل مشوار ولاقية الأسواق كلها مليانة بالأكل..ممكن فعلا الريحة تجوعني. بس وأيه يعني؟ مش حأنهار على روحي وأقوم فاطرة عشان الريحة حلوة. ولا حأروح مزعقة في الجماعة الكفرة اللي هنا وأقولهم أنهم ما عندهمش أي مراعاة لمشاعر المسلمين اللي عايشين في البلد. أنا بأروح الجيم وبأعمل رياضة وأنا صايمة وبالتالي بأتعب جامد من غير ما أقدر أشرب. باقي الخواجات اللي في الجيم بيشربوا عادي. برده وأيه يعني؟ مش عشان عطشانة وشايفة ناس بتشرب قدامي يبقى حأقوم ماسكة زجاجة المايه بتاعة أقرب واحدة واخد منها شفطة. حأحتسب الموضوع عند ربنا وأدعي ربنا أنه يثيبني على صبري وعلى صيامي. في سنة من السنين كنت بأشتغل في مكان عمل كل اللي فيه مش بيصوم إلا أنا. جم في أول يوم رمضان عايزين يطلبوا أكل واستأذنوني: هل يا نادية تتضايقي لو طلبنا أكل؟ قلت لهم وأتضايق ليه؟ اعملوا اللي يريحكم طبعا. كان من جم الأدب أنهم يستأذنوني. ده اسمه مراعاة للشعور. وأنا من طرفي ما يفرقش عندي تماما ان حد يفطر قدامي مهما كان سببه شرعي ولا لأنه عاصي ولا لأنه غير مسلم أساسا. مش شغلي. صيامي ده بأصومه لربنا سبحانه وتعالى مش لحد. واللي ما بيصومش ده برده شيء بينه وبين ربنا ماليش أي دخل فيه ولا يؤذيني بالمرة أكله

بأتعجب من الرجالة (أصل الصراحة الكلام بييجي في الغالب من الرجال مش من النساء) اللي تقولك شعر الست غير المحجبة بيفتني أو لما أشوف سنتدويتش قدامي بأتأذي. أمال عايزين تروحوا تحاربوا إسرائيل ازاي وتحرروا القدس ازاي؟ ولا بتقولوا عايزين نعمل ثورة في مصر ازاي ونتبهدل ايه في السجون وتعذيب وما تعذيب…لو مش قادر تتحكم في نفسك ومشاعرك قدام شعر واحدة ست أو قدام سندويتش وانت صايم عايز تقنعني انك سبع البرمبة وحتعرف تعمل الباقي ده كله؟ ابني اللي عنده ١٧ سنة واللي ما عندهوش أية طموحات جهادية حالية لا بينهار نفسيا قدام بنت مش محجبة ولا بيتأثر خالص لما بآكل قدامه فطيرة بالآيس كريم. أنت بقه اشرح لي فين مشكلتك؟ رجالة خرعة صحيح

أما بقه الرجالة اللي تقولك الحياء والست ما تعرفناش انها حائض. انت بيحصلك ايه لما تعرف ان زميلتك في الشغل حائض يعني؟ مشكلتك النفسية أيه مع الحيض؟ صحيح مافيش أي واحدة فينا عندها أي رغبة أنها تحط يافطة حمراء حولين رقبتها لما بتحيض وتعمل إعلان عام قدام الناس. لكن انا لو حائض والناس قامت قدامي تصلي جماعة ما أنا حأفضل قاعدة مكاني ومش حأقوم اصلي معاهم. تبقى اتفهمت. فين المصيبة اللي حصلت ولا فين قلة الحياء مني؟ ولو عطشت في يوم حر في رمضان مافيش أي شيء يمنع أني أشرب شوية مايه أروي عطشي. ولو قاعدة في الشغل وجعانة جدا حآكل السندويتش اللي شايلاه معاي في الشنطة. مش لازم أقعد أستخبى وأعمل شقلباظات عشان ماحدش يشوفني ولو حد شافني يبقى يا ويلي يا سواد ليلي دول عرفوا أني حائض. هو فيه أيه؟ هو ماله الحيض عامل معاكم زي البعبع كده؟

استرجل شوية انت وهو. حتقولي الأمر بالمعروف والنهي عن المنكر…يا سيدي مش من حقك انك تجري ورا كل واحد بياكل في نهار رمضان وتعرف هو فاطر ليه..بعذر ولا من غير. الدولة لها سياسات وقوانين في الموضوع ده شيء ثاني. وقصة ثانية. ومناقشة أخرى. لكن انت كفرد مش من حقك تنخور ورا الناس وتعرف أسبابهم في الإفطار. اللي فاطرة عشان عندها الحيض أو لأنها حامل أو لأنها مرضع…او اللي فاطر لأنه مريض…أو اللي فاطر لأنه مش مسلم…أو اللي فاطر لأنه عاصي…الصوم ده بين العبد وربه..وطبعا دلوقت الدولة دخلت في الموضوع فالصوم بقى بين العبد وربه والدولة. لكن انت مش طرف في الموضوع. استرجل بقه. استرجل وما تخليش السندويتش يخوفك اوي كده وما تخافش اوي كده من بعبع الحيض. استرجل عشان لما تكبر تقدر تحرر فلسطين

Advertisements

2 thoughts on “بعبع الحيض ونهار رمضان

  1. الحائض والمريض هما أكثر الناس احتياجا للسوائل في نهار رمضان الحار هذا العام .. وربنا إدانا الرخصة .. في إية بقى؟ حياء إية بس .. كم من الجرائم التي يرتكبها الرجال في حق النساء وسلبهم لحقوقهن باسم الحياء .. ويقولك إذا بليتم فاستتروا .. هو حد قالهم إني معرية نفسي عشان أقول إني حائض.. وكمان فين البلاء؟؟ كل بنات حواء كدة ..ربنا خلقنا كدة .. مش بلاء أبدا .. الناس بتصدق في خرافات وأساطير لدرجة إني لما اعترضت على جملة “إذا بليتم فاستتروا” لقيت واحدة بتحاول تقنعني إن ربنا عاقب حواء عشان سمعت وسوسة الشيطان وغوت آدم وخلته ياكل التفاحة فربنا بلاها بالحيض !! قولتلها طب ما إناث الحيوانات تحيض إية المشكلة مش فاهماكي .. بجد إحنا اللي عندنا تخلف واحتقار رهيب لآدميتنا

    Like

  2. وجهة نظري مختلفة تماما ، بالنسبة عدم مجاهرتي بالفطر في أيام مش هسميها عذر بصراحة و لكن أيام الفرض ، لان زي ما صيام رمضان فرض فبرضه إفطار أيام الحيض فرض و في الحالتين هو تنفيذ لأمر الله ، ليه بقى مش همشي آكل و أشرب في الشارع ؛ تعظيما لشعائر الله ، تعظيما لشهر الصوم حتى لو أنا مفطرة بأمر الله

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s