رمضان والرياضة وأنا

أواظب على الرياضة من عدة سنوات لكن دايما أحتار في رمضان أيه اللي ممكن أعمله. طول ما اليوم قصير كان ممكن أعمل شوية رياضة بالليل بعد الفطار أو قبل المغرب على طول من غير أي مشاكل. لكن يوم الصيام أصبح طويل جدا دلوقت واحن في عزالصيف..وأنا كمان موجودة في انجلترا السنة دي حيث عدد ساعات الصيام حوالي ١٩ ساعة. قررت أني مش حأترك الرياضة في رمضان السنة دي رغم الصعوبات. أصلي عارفة كويس أوي صعوبة الرجوع للمواظبة على الرياضة بعد تركها. وعارفة أنا ممكن أفقد لياقة قد أيه بسبب ترك  الرياضة لمدة شهر. أسفل تلاقوا ملخص تجربتي مع الرياضة أثناء رمضان حتى الآن وهو كلام منقول من ستاتس كتبته على الفيسبوك الأسبوع الماضي

ملخص اللي تعلمته: المهم تمارس الرياضة في الوقت الصح بالنسبة لك ولظروفك وبالمقدار الصح بالنسبة لك ومع معرفة جيدة لاحتياجاتك البدنية

التفاصيل gym

١. لو مش بتعمل رياضة أصلا ما حبكتش تبدأ في رمضان وأنت صائم. لكن مافيش أي شيء يمنع أنك تبدأ تروح الجيم أو تتمشى شوية طالما بعد الإفطار وطالما عندك ما يكفي من وقت بعد الإفطار عشان تهضم أكلك ثم تتريض ثم تدخل سوائل وطاقة إلى جسمك. أغلبنا حاليا عايش في بلاد عدد ساعات الصيام فيها طويل وعدد ساعات الإفطار قليل (وربما قليل جدا زيي حيث أني حاليا في بريطانيا). وبالتالي مش سهل انك تفكر تبدأ تعمل رياضة لأول مرة في رمضان تحت الظروف دي. لكن انك تبدأ رياضة المشي سواء كان أثناء الصيام قبل المغرب مثلا أو بعد الإفطار بساعة أو ساعتين فده شيء جميل

٢. لازم تكون فاهم احتياجات جسمك: انا عارفة عن نفسي مثلا اني لما بأمارس رياضة الجري بأحتاج لسوائل كثيرة جدا قبل وأثناء وبعد الجري ومع ذلك وارد برده يجيلي صداع. وبالتالي عمري ما حأفكر أمارس رياضة الجري لو الظروف مش سامحالي اني أشرب ما يكفي من مايه وسوائل. بما أني صايمة في انجلترا السنة دي، ممارسة الرياضة بعد الإفطار مستحيل لأن المغرب بيؤذن الساعة ٩ ونص بالليل. لا فيه وقت عشان أهضم الأكل ولا في جيم مفتوح في الوقت ده ولا أنا عبيطة عشان أخرج أعمل رياضة في الشارع بالليل في مكان مافيهوش هس بني آدم. وبالتالي مافيش قدامي غير أني أعمل رياضة أثناء فترة الصيام. النتيجة أني قررت أني ما أمارسش رياضة الجري أثناء رمضان لأني مش حأقدر أدي لجسمي احتياجات الرياضة دي

٣. جرب نفسك واحدة واحدة: مع اني فاهمة احتياجات جسمي كويس لأني أمارس الرياضة من سنوات إلا انا بدأت أمارس الرياضة في أول أسبوع من الصيام بالراحة. بأتأكد الأول اني بأتسحر كويس وبأكون شاربة سوائل كثيرة ما بين الإفطار والسحور. وبعدين رحت الكلاسات اللي في الجيم اللي ظنيت اني أقدر أعملها وأنا صايمة من غير ما أفقد سوائل كثيرة من جسمي ومن غير ما أتعب جامد. كمان قللت الأوزان اللي متعودة أشتغل عليها أولا لأني كان بقالي شهرين ما بأشتغلش أوزان من أساسه وثانيا لأني مش عارفة جسمي ممكن يتعامل ازاي مع شغل الأوزان اثناء الصيام. اللي لقيته هو أني قادرة أشتغل عادي جدا في الكلاسات في الجيم. بأعطش آه. بس مجرد ما بيخلص الكلاس وبآخد الدش بتاعي خلاص العطش بيروح. وده راجع غالبا لأني شاربة سوائل كويس من بالليل. في الأسبوع الثاني من الصيام رجعت للأوزان العادية اللي متعودة عليها. وبأعمل كل التمارين اللي بتزود سرعة القلب معاهم عادي. وبأراقب نفسي كويس. يوم ما حأحس بدوخان حأبطل. مش بأدوس على نفسي جامد اوي لكن بأحاول أحافظ على اللياقة العامة اللي كانت عندي قبل رمضان. ونافع. وزي ما قلت: ممتنعة عن رياضة الجري تماما وعن كلاس السبننج (ركوب دراجة ثابقة في مكانها) تماما لأني عارفة أن الحاجتين دول بأحتاج عشانهم سوائل أكثر بكثير مما تسمح به ظروف الصيام في انجلترا

٤. فوائد الرياضة الأخرى: أنا لقيت أن لو عدى علي يومين من غير ما أعمل رياضة خالص نفسيتي بتبقى مش كويسة. الرياضة بتحسسك بانتعاش وبإنجاز. ما تخسرش الفائدة دي بسبب الصيام

ملخص اللي بأعمله: بأروح الجيم ٣ مرات في الأسبوع. كنت قبل رمضان بأروح الجيم ٤ مرات في الأسبوع. الكلاس اللي مش بأروحه هو كلاس السبننج. كنت متعودة أجري مرتين في الأسبوع. مبطلة جري في رمضان. لكن طلعت بالعجلة الأسبوع ده ركبت ٢٠ كم مرتاحين من غير ما أدوس على نفسي من باب المحافظة على لياقة ولو بدائية في ركوب العجل. وزي ما قلت: بأعطش لكن العطش بيروح مجرد ما بأخلص رياضة وبآخد الدش

وبالتالي رأيي: ما تخافش من العطش في حدود…ما تفتكرش أنك لازم تبطل رياضة في رمضان…ما تضيعش كل المجهود اللي عملته عشان تبقى عندك لياقة في الشهور اللي فاتت…بيبقى صعب أوي أوي أوي انك ترجع تعمل رياضة لما تبطلها مهما كان السبب فحافظ على الانتظام بالطريقة اللي تناسبك. لو الظروف تسمح أنك تتريض بعد الإفطار ده أفضل كثير. لكن لو الظروف ما تسمحش فالرياضة أثناء الصيام ممكنة طالما واخد بالك من نفسك كويس اوي

طبعا كل واحد لازم يراعي الظروف اللي هو فيها. يوم الصيام أقصر في مصر منه في انجلترا. كمان بتلاقي كل الأماكن مفتوحة بالليل بعد الصيام. يعني وارد أنه يكون أنسب لك أنك تروح الجيم قبل الإفطار على طول أو أنك تمارس رياضتك بالليل بعد ما تهضم أكلك. الفكرة هي أنك تشوف أيه اللي يناسبك وبيناسب ظروفك. الفكرة أنك تقدر

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s